მტრები. ამბავი ერთი სიყვარულისა.

ნობელის პრემიის ლაურეატი პოლონელ-ამერიკელი მწერლის იცხოკ (ისააკ) ბაშევის ზინგერის გახმაურებული რომანი ომის ტრავმების ფონზე ჩასახული სასიყვარულო მრავალკუთხედის შესახებ.

სად მიდის ომი მას შემდეგ, რაც დასრულდება, ან მიდის კი სადმე? როგორია ომგამოვლილი ადამიანების ცნობიერება და ცხოვრება ომის დაწყება-დამთავრების დაფიქსირებული თარიღების მიღმა?

ჰერმან ბროდერი გადაურჩა ომს და ჰოლოკოსტს, ცხოვრობს ნიუ-იორკში, აქვს სამსახური, აღარ არის უპოვარი და აღარავინ დევნის, მაგრამ ის მაინც მუდმივ შიშში, შფოთვაში, დაუსრულებელ სიცრუესა და დაბნეულობაშია. არაფრით გამორჩეული, წარსულის ტრავმებით დამძიმებული კაცის ცხოვრებას ნორმალური კალაპოტიდან აგდებს მის თავს დატეხილი სასიყვარულო ბადეც - სამი ქალის სამგვარი სიყვარულის ტრაგიკომიკური და გროტესკული თავგადასავალი, რომელსაც ის ეგზისტენციალურ საფიქრალამდე მიჰყავს.

„მტრები. ერთი სიყვარულის ამბავი“ დიდოსტატის მიერ მოთხრობილი ამბავია იმაზე, როგორ შეიძლება ეძებო და ვერ იპოვო თავისუფლება, თავშესაფარი და შვება მაშინაც კი, როცა ეს ყველაფერი გეძლევა, და რომ ყველაზე დაუძლეველი და დაუსრულებელი საკუთარ თავთან გამოცხადებული ომია.